السيناريست إنجي علاء عن تطورات حالتها الصحية: "خرجت من العمليات شايفة كل حاجة مزغللة"

 تحدثت السيناريست إنجي علاء، عن تطورات حالتها الصحية بعد العملية الجراحية التي أجرتها مؤخرا.

وقالت إنجي علاء: "١٦ سبتمبر، الساعة ١٠ صباحا.. اللحظة اللي غيرت كل حاجة..خرجت من العمليات شايفة كل حاجة مزغللة.. زي الدنيا بالظبط..عمري ما تخيلت إن الحياة ممكن تتغير بالشكل ده! أنا نفسي مش أنا!".

وتابعت:"الألم، الأدوية التقيلة، المضاعفات، الدوخة، عدم الاتزان وغيره.. خلوني أروح عالم تاني.. عالم حقيقي..
دخلت العملية وأنا عندي أمل إني أرجع زي زمان، وأتخلص من الألم والتشنجات اللي استنزفتني لسنين طويلة.. ماكنتش أعرف إن الرحلة اللي بعد العملية هتكون رحلة تانية أصعب بكتير مما تخيلت" .

وأوضحت:"فجأة لقيت نفسي في مواجهة حاجات ماكنتش مستعدة ليها.. بس افتكرت ان ربنا قال: «لا يكلف الله نفسا إلا وسعها».. بس أنا ضعيفة يا رب.. وبعدين اكتشفت إن الضعف مش انكسار.. في فرق. وأكيد ربنا سبحانه وتعالى اختارلي ده لسبب.. واتعلمت لحد دلوقتي الحمد لله كتير..اتعلمت إن أبسط تفاصيل حياتنا اللي بتعدي من غير ما نحس بيها هي في الحقيقة أكبر النعم".

واستكملت:"إنك تقدر تضحك.. تقوم تمشي.. ولو مشيت ماتخفش تقع.. تسمع صوت بتحبه.. إنك تدخل مكان مليان أصوات من غير ما تحس إن الدنيا بتنهار حواليك.. إن عينك تقفل وإنت بتنام.. وغيرها نعم كتير ما بنعرفش قيمتها غير لما بنفقدها".

وتابعت:"اتعلمت إن في ناس بتظهر في أصعب لحظاتك من غير ما تطلب.. وناس بتختفي رغم إنك كنت متخيل إنهم أقرب الناس ليك! وفي ناس مواقفها بتقول كلام عمر الكلام ما كان هيقدر يقوله..في ناس بتحبك لشخصك.. وناس بتحب اللي بتقدمهولها.. وناس أنانية.. وناس ما بتحسش بألم غيرها وفي كمان ناس ممكن تزود عليك ألمك.. وناس بتظهر والدنيا سهلة.. وناس تانية معدنها أصيل وموجودة في كل وقت ومش بالكم بالكيف".

واستطردت:" إحنا ملك ربنا سبحانه وتعالى، هو العالم بالأحسن لينا، وإحنا مش متحكمين في حاجة.. بنحاول بس وكله بأمر الله..يمكن التجربة أخدت مني حاجات كتير، لكن علمتني أشوف حاجات ماكنتش شايفاها، وأفهم حقيقة الحياة والناس..اتعلمت الصبر.. فكرة إن العصب بيرجع ملي في اليوم.. سبحان الله! وبالرغم من أي مضاعفات تانية الدكاترة اجزموا إن مافيش أمل فيها تتحسن، عندي أمل في ربنا وراضية بكل حاجة".

وأضافت:"الحمد لله على كل حال.. الحمد لله على كل نعمة عرفنا قيمتها، وعلى كل درس حتى لو كان مؤلم، وعلى كل حقيقة ظهرت مهما كان وجعها..يا رب أكمل شفائي على خير، وأرجع أحسن من الأول ونور بصيرتي.. ويا رب اشف كل مريض وهون عليه وعلى اللي بيحبوه..شكرا يا رب على كل شيء".